A Retrieved Reformation
ආදරයෙන් ආලෝකයට
01 කොටස
ජිමී වැලන්ටයින් යුහුසුළුව සපත්තු මැසීමෙහි නිරතවී සිටි බන්ධනාගාර සපත්තු වැඩපොළ වෙත පැමිණි මුරකරුවකු ඔහුව කාර්යාලය වෙත කැඳවාගෙන යන ලදි. එහිදී බන්ධනාගාර නියාමක විසින් එදින උදෑසන ආණ්ඩුකාරවරයා විසින් අනුමත කරනලද ඔහුගේ සමාව පිරිනමනු ලැබුවේය. ජිමී එය බාරගනු ලැබුවේ තරමක් වෙහෙසට පත්වූවෙකු විලසිනි. ඒ වනවිට ඔහු සිය සිව් අවුරුදු සිර දඬුවමෙන් මාස දහයකට ආසන්න කාලයක් ගතකොට අවසන්ව තිබිනි. එහෙත් ඔහු සිරගෙදර මාස තුනකට වඩා ගත කිරීමට බලාපොරොත්තු නොවීය. සාමාන්‍යයෙන් ජිමී වැලන්ටයින් වැනි දැන හැඳුනුම්කම් බහුල පුද්ගලයින්හට හිමිවන සිර දඬුවම් සිරගෙදරට ඇතුලු කරනවිට මුඩුකරන හිසකෙස් නැවත වැවෙන තුරු වත් පවතින්නේ නැත.
"හොඳයි වැලන්ටයින් තමුසෙට හෙට උදේ යන්න පුලුවන්. දැන් ගිහින් සුද්ධ පවිත්‍ර වෙලා ලෑස්ති වෙනවා. තමුසෙ එච්චර නරක මිනිහෙක් නෙමෙයි. ඔය සේප්පු කඩන එක නවත්තලා සාධාරණ විදිහට ජීවත් වෙන්න බලනවා." බන්ධනාගාර නියාමක කියා සිටියේය.
"මම...? මම කවදාවත් සේප්පුවක් කඩලා නෑ." ජිමී පැවසුවේ පුදුමයට පත්වූවෙකු ලෙසිනි.
"අපොයි නෑ නේන්නම්" බන්ධනාගාර නියාමක සිනාසුනේය. "එහෙනම් කියනවා බලන්න ස්ප්‍රින්ග්ෆීල්ඩ් මංකොල්ලයට තමුසෙ කොහොමද හිරේ ගියේ කියලා. සමාජයේ වැදගත් මනුස්සයෙකුට නින්දාවෙයි කියලා තමුසේ ඇත්ත වසන් කළාද ? එහෙමත් නැත්නම් ජූරියේ කට්ටියට තමුසෙත් එක්ක පෞද්ගලික කෝන්තරයක් තිබුනද ? සාමාන්‍යයෙන් තමුසෙලා වගේ උපාසක බළල්ලුන්ට වෙන්නෙ ඔය දෙකින් එකක් තමයි"
"මම...මම ජීවිතේට ස්ප්‍රින්ග්ෆීල්ඩ් ගිහින් නෑ" ජිමී පැවසුවේ නියාමකවරයා පැවසූ දෙයින් විමතියට පත්වූ අයුරිනි.
"ක්‍රොනින්, මෙන්න මේ යකාව එක්කන් යනවා. ගිහින් පිටත් කරන අයට දෙන ඇඳුම් අන්දලා හෙට උදේ හතට ඔෆිස් එකට එක්කන් එනවා. වැලන්ටයින්, මගේ අවවාදය හිතට ගන්න එක තමුන්ගෙ ඇඟට ගුණයි"
පසුදින උදේ හතයි කාල වනවිට නිදහස ලබා පිටව යන සිරකරුවන්ට නියමිත ඇඳුමින් සැරසුන ජිමී බන්ධනාගාර නියාමක කාර්යාලය ඉදිරිපිට සිටගෙන සිටියේය.
එහිදී ලිපිකරුවා විසින් දුම්රිය ප්‍රවේශ පත්‍රයත් ඩොලර් පහේ නෝට්ටුවකුත් ඔහු වෙත ලබා දෙනලදි. සිරගතව සිට නැවත සමාජගත වන පුද්ගලයින් එම මුදලින් නීත්‍යානුකූල ජීවිකාවක් අරඹනු ඇතැයි යන බලාපොරොත්තුවෙන් රජය විසින් එම මුදල ලබාදෙයි. ඔහු වෙත සුරුට්ටුවක් පිළිගැන්වූ බන්ධනාගාර නියාමකවරයා අතට අත දී ආචාර කළේය. වැලන්ටයින් - 9762, ආණ්ඩුකාරවරයාගේ සමාව ලද්දෙකු ලෙස ලේඛනගත වූ අතර ජේම්ස් වැලන්ටයින් මහත්මයා නිදහස් මිනිසෙකු ලෙස පිටතට පැමිණියේය.
තමා අවට පරිසරයේ අපූර්වත්වය වෙත කිසිඳු අවධානයක් යොමු නොකළ ජිමී කෙළින්ම අවන්හලක් වෙත පියමැන්නේය. එහිදී ඔහු තමා ලද නිදහසේ සුවය වින්දේ පුලුස්සන ලද කුකුළ් මස් දීසියක් සුදු වයින් බෝතලයක් සහ බන්ධනාගාර නියාමකවරයා පිළිගැන්වූවාට වඩා ඉස්තරම් වර්ගයේ සුරුට්ටුවක් රස විඳීමෙනි. ඉන්පසුව ඔහු නිවාඩු පාඩුවේ දුම්රිය නැවතුම්පළ වෙත ගමන් කළේය. දුම්රිය නැවතුම්පළ ඉදිරිපිට සිඟමන් යදිමින් සිටි අන්ධ පුද්ගලයා වෙත කාසියක් දැමූ ඔහු සිය දුම්රියට නැග අසුන් ගත්තේය. පැය තුනකට පමණ පසු දුම්රිය ප්‍රාන්ත සීමාව අසබඩ පිහිටි කුඩා නගරයකට සේන්දු විය. මයික් ඩෝලාන් නැමැත්තකුගේ තානායම වෙත ගිය ඔහු කවුන්ටරය පිටුපස හුදකලාව සිටි මයික් හට අතට අත දී ආචාර කළේය.
"ජිමී, මීට කලින් එළියට ගන්න බැරිවුනාට සමාවෙයන් යාලුවා. අපිට සිද්ධ උනා ස්ප්‍රින්ග්ෆීල්ඩ්ල ඉදිරිපත් කරපු විරෝධතාවය නිෂ්ප්‍රභා කරන්න. ආණ්ඩුකාරයා තව ඩිංගෙන් විරෝධතාවය පිළිගන්නවා. ඉතින් කොහොමද සැප සනීප?" මයික් කියාගෙන ගියේය.
"වරදක් නෑ. මගේ යතුර තියනවද?" ජිමී කීවේය.
යතුර රැගත් ජිමී ඉහළ මාලයට ගොස් පිටුපස කොටසේ තිබූ කාමරයක දොර විවර කළේය. සියල්ල ඔහු පිටව යනවිට තිබුනු ආකාරයෙන්ම තිබිනි. ජිමීව අත්අඩංගුවට ගැනීමට පොරබදන විට ඉරීගිය රහස් පරීක්ෂක බෙන් ප්‍රයිස්ගේ කොලර් බටනය පවා පොළොව මත වැටුනු ආකාරයෙන්ම තිබුනි.
බිත්තියට සවිකර තිබූ හකුලන ඇඳ දිගහැරගත් ජිමී ඊට පිටුපස බිත්තියේ වූ පුවරුවක් පසෙකට තල්ලු කොට දූවිලි වැකුණු සූට්කේසයක් එළියට ගත්තේය. එය විවෘත කළ ඔහු ආඩම්බරයෙන් බලා සිටියේ මුලු නැගෙනහිර ඇමෙරිකාවේම තිබූ ඉස්තරම්ම සේප්පු බිඳින ආයුධ කට්ටලය දෙසය. විශේෂයෙන් වාත්තු කරනලද වානේ වලින් සෑදූ මාදිලි කිහිපයක විදින කටු, බුරුම, යවකාර ආදියෙන් සමන්විත වූ එය සර්ව සම්පූර්ණ කට්ටලයක් විය. සියලුම ආයුධ ඔහු විසින්ම සැලසුම් කිරීම පිළිබඳව ජිමී ආඩම්බර විය. වෘත්තීයමය මංපහරන්නන්හට උපකරණ නිෂ්පාදනය කරන තැනකින් මෙය සාදවා ගැනීමට ජිමී හට ඩොලර් නවසීයකට අධික මුදලක් වැයවී තිබිනි.
පැය භාගයකට පසුව මනා ලෙස හැඳ පැළඳ ගෙන දූවිලි ඉවත් කරනලද සූට්කේසය අතින් ගත් ජිමී පහත මාලයේ ආපනශාලාව වෙත පැමිණියේය.
"අලුත් වැඩක් සෙට් උනාද?" මයික් ඩෝලාන් සිනහමුසු මුහුණකින් යුතුව ඇසුවේය.
"මම? මම වැඩ කරන්නේ නිව්යෝක් ඒකාබද්ධ බිස්කට් සහ තිරිඟු පිටි සමාගමේ. ඔයා මොනවද මේ කියවන්නේ?" ජිමී කීවේ අන්දමන්ද වූ ආකාරයෙනි.
එම පිළිතුරෙන් මයික් කොතරම් අමන්දානන්දයට පත්වූයේදැයි කිවහොත් එවෙලේම ඔහු ගනනේ සැහැල්ලු මධ්‍යසාර අඩියක් ගැසීමට ජිමී හට සිදුවිය. ජිමී කිසිදිනක සැර මධ්‍යසාර පාවිච්චි කළේ නැත.
දෙවැනි කොටස බලාපොරොත්තු වන්න...
Comments
Post a Comment